“Kana šundem ando TV ke e roma na maren pen vaš i Ukraina, manglem te sikavav ke kado na-i čačo.”

O Viktor Ilchak liljas jekh prizo vaš i zor ando maripe pal o arakhipe le Ukrainako katar i rusikani agresia. Kado intervio lesa avel khetanes amare raportosa Maripe vaš jekh maj Čačutno Avutnipe, sovo sikavel e kontribucie le romenge ko arakhipe le Ukrainako, rodel o impakto le marimasko ande romane komunitete thaj del ideje vaš o inkluzivo vazdipe pal o baro maripe. 

Savo sas o maj baro pharipe ande tiro dživipe thaj sar nakhljan opral kodo? 

O angluno pharipe sas o dživipe jekhe manušesko kaj si les romani nacionaliteta. Barilem ando čororipe. O dujto pharipe sas o baro maripe. Semas soldato de andar o berš 2015, de kana uštjavdjas pes le Ukrainaki phuv thaj dži kaj astardjas o buhljardo baro maripe. Servisardem ande Armiake Zora. Ande kadaja vrjama, sas man štar zorale daba.  

Kon vaj so inspirisardjas tut te džas maj dur ande phare momenturja? 

Kana šundem ando TV ke e roma na maren pen vaš i Ukraina, manglem te sikavav miro eksemplo ke kado na-i čačo. Maj but, džanav sode but daran vaš mande miri romni, mire čhave thaj sa mire njamurja. Jekh data na sas man konekcia sar duj kurke thaj anav mange andi godi sode darane sas savore vaš mande. Kado del man i zor te džav maj dur.  

Šaj vakeres pal jekh momento kana kamnjan te mekes tut, ama geljan maj dur, so zorjardjas tut? 

Si man amala militarja, tufetjenge phrala. Naštisalem te mekav man. Mardjam amen khetanes thaj dinjam amen vast jekh averes ande amaro 128-to Brigadako Asalto ande Plaja. Vi akana džutisarav len thaj bičhalav lenge sja so trebal len. Bibahtasa, but andar lende mule.  

Sar ačhjos pozitivo kana si tut pharimata? 

Sem jekh manuš pozitivo ande miro dživipe. Pakjav ke kadalake si maj loko andar mande te nakhav opral e pharimata.  

Savo sfato šaj te des varekaske kaj nakhel andar jekh pharo momento? 

Na džanav savo sfato te dav kana si jekh maripe kaj džal angle. Si pharo andar savore akana. Mangav savorenge sastipe thaj te agorisarel pes o maripe sar maj sigo.  

Sar paruvde tiro dikhipe pal o dživipe e problemurja andar savende nakhljan? 

Butivar nakhav andar e pharimata. I romani komuniteta na si lan e maj lačhe kondicie te barjol. Si phares te arakhes jekh buti thaj te thos tut tire khereste ando dživipe. Vi kadja, na planuisarav te bešav andi Švajcaria, kathe kaj sem mire familiasa akana. Planuisarav te džav palpale khere. Sas kadja ke miri romni thaj mire čhave phares dikhle man: maj anglal sas o maripe kaj astardjas ando 2014 thaj pal kodo, i buhli rusikani invazia. Akana mangav te bešav lenca. Ama te trebala, sem gata te marav man vaš i Ukraina palem.

Save lekcie sikliljan andar e pharimata kaj nakhljan? 

Si pharo te des duma pal e lekcie. Sas but pharo. Te na semas šokisardo thaj dino dab zorales, maravas man maj dur.  

Sar pakjas ke šaj te del vast tiri eksperienca avere manušen kaj nakhen andar sa kasave pharimata? 

Trebal te das amen vast jekh averes, amare tufetjenge-kamaradurjen, te džutisaras amen jekh averes thaj si te ovel maj lokes te nakhas opral e pharimata.  

So motivisarel tut te džas maj dur, vi kana e butja fan tuke bišajutne? 

Miri familia thaj mire čhave. Mire tufetjenge phrala. Trebal te džas maj dur te šaj te des len vast.  

Kana dikhes palpale, ande tiro drom nakhindos opral e pharimata, so kerel tut te oves barikano? 

Daštisajlem te nakhav opral o čororipe thaj te lačharav i financialo situacia mire familiaki. Sem barikano ke sem soldato rom! Na džanav kaj servisaren aver roma, ama me sem jekh andar e cira roma kaj keren kodo. Lilem vi prizurja katar o šerutno le forosko Uzhhorod. Kado na maj ačhilo maj anglal. Sas but mišto.  

Soske dikhes tut erovo? 

Me na dikhav man erovo. Sem jekh simplo soldato. Gelav maj dur miri buti kaj del pes mange, kana si amen marimaske operacie. Sem mekaniko-šofjori katar jekh BMP-2. Na phendem nijekhdata mire komandantoske ke na-i te džav varekaj te kerav jekh buti vaj ke na kamav te kerav lan. Trebalas te kerav lan. Gelem thaj inkaldem avri manušen kaj sas dine dab.