"Sem inspirisardo te džav maj dur thaj te aresav ke mire cilurja, perdal e pharimata"

O Ilya Gerasimov si jekh sudento angadžisardo civiko, jekh andar e but roma kaj si butivar biprindžarde soske na si len than ande societalo dikhimata. Kado intervio lesa, avel khetanes amare raportosa Maripe vaš jekh maj Čačutno Avutnipe savo sikavel e kontribucie le romenge ko arakhipe le Ukrainako, rodel o impakto le marimasko ande romane komunitete thaj del ideje vaš o inkluzivo vazdipe pal o baro maripe.

Savo sas o maj baro pharipe ande tiro dživipe thaj sar nakhljan opral kodo? 

Miri maj phari problema si kana mire opinie na-i akceptisarde akalavrendar. Si lačhe mire ramosarimata pal so si čačo vaj bičačo, pal i disidenca thaj kreativiteto? So si te phenen aver thaj savi reakcia si te ovel len? Andar mande i vašno provokacia si te ovav decisivo thaj te pakjav ande mande, maj anglal, te šunav man thaj pal kodo te cirdav konkluzie andar soste si averen phenimaske. 

Kon vaj so inspirisardjas tut te džas maj dur ande phare situacie? 

Sem inspirisardo te džav maj dur thaj te aresav ke mire cilurja, perdal e pharimata. Miri familia del man suporto pal sa mire eforturja thaj na meken man te perav kana na džal sa mišto – specialo miri daj, voj sikavel mange pal pesko eksemplo ke e phare momenturja vazden amen thaj keren amen maj zorale.  

Šaj vakeres pal jekh momento kana kamnjan te mekes tut, ama geljan maj dur, so zorjardjas tut? 

Ande verver situacie andar miro dživipe manglem te mekav man thaj jekh specialo darako momento sas i invazia. Kana astardjas i buhli rusikani invazia, sa mire sune thaj planurja vaš o avutnipe sas peravde. I determinacia thaj o khetanipe le manušengo ande mange palpale o šajpe te dikhav suno thaj te kerav planurja perdal kado nevo realiteto. Maj palal, i pakiv ke sakojekh si vašno thaj ke anel kontribucia ke amari viktoria andjas mange inspiracia thaj dinjas man i zor te džav maj dur. 

Sar ačhjos pozitivo kana si tut pharimata?  

Dikhav te inkerav man pozitivo kana si pharimata thaj bariere ande miro dživipe. Rodav le manušen kaj anen mange pozitivo emocie. Vaš mande, kadala manuša si mire maj tikne phrala thaj phenja, lengo vulnerabiliteto thaj lengo čhavorikano spirito anel mange dud thaj pozitivo energia, den man vast te nakhav andar savore andrutne pharimata.  

Savo sfato šaj te des varekas kaj nakhel andar jekh pharo momento orta akana?  

Kodolen kaj nakhen akana andar pharimata davas len o sfato, te dikhen palpale thaj te den pes godi pal pengo drom: sode butja dikhljan; opral sode pharimata nakhljan; savo džutimos thaj patjamos arakhljan; sode manuša patjan ande tute thaj si te den tut vast čačimasa ande savore phare momenturja.  

Sar paruvde tiro dikhipe pal o dživipe e problemurja andar savende nakhljan? 

Andar saki provokacia kaj nakhlem lan cirdinem konkluzie pal o phiripe andar miro dživipe thaj kadaja buti paruvdjas man thaj džutisardjas man te aresav jekh maj lačhi versia miri. Kado dinjas man vast te vazdav miri zor, miri rezilienca thaj o šajpe te lav decizie ande kritikane situacie.  

Save lekcie sikliljan nakhindos andar e pharimata? 

I maj vašno lekcia kaj siklilem lan nakhindos andar e pharimata si ke na den pes amenge pharimata kaj našti gelas – dašti te nakhas opral savorende. I maj vašno buti si te pakjas thaj te na mekes tut.  

Sar pakjas ke šaj te del vast tiri eksperienca avere manušen kaj nakhen andar sa kasave pharimata? 

Vi kana miri eksperienca na-i bari, pal mire 20 berša dživimaske šaj te dav o sfato ke na-i nijekh data but palal te astares palem katar o anglunipe thaj te des tut godi pal tiro drom ande jekh nevo modo. Si amenge dino jekh dživipe te dživas les, te dživas verver sako dives, te hatjaras sode vašno si o paruvipe thaj lesko impakto ande amaro avutnipe.  

So motivisarel tut te džas maj dur, vi kana e butja fan tuke bišajutne? 

So motivisarel man te džav maj dur thaj te na mekav man nijekhdata si e cilurja kaj thodem len mange thaj e oportuniteturja kaj šaj te putrav len vaš mande thaj miri familia.  

Kana dikhes palpale, ande tiro drom nakhindos opral e pharimata, so kerel tut te oves barikano? 

I buti kaj kerel man te ovav barikano si ke astardem te deklarisarav aktivo civiko pozicie, te vakerav pal e butja phangle ke miri societeta thaj te thav man sar lidero kaj šaj te del maj dur godisarimata thaj te dav vast te hatjaren pes. Lačharindos mire džanimata thaj barjarindos neve lideršiposke siklimata, vaš miro eksemplo, vakerindos publiko e butja ande jekh bistandardikano modo, zorjarav averen te alosaren verver domenurja thaj te aresen publikane manuša kaj den vast.  

Soske dikhes tut erovo? 

E eroja na-i biande, von aresen kadja. Thaj pakjav ke sako manuš opral kadaja phuv si jekh erovo, ama ke verver nivelo, jekh nivelo kaj si ko alosaripe sarkonesko. Sem me jekh erovo? Va! Ke savo nivelo? O dživipe si te phenel.