"Miri phuri sikavdjas mange ke vi ande jekh lumja kaj e čačimata le džuvljenge si butivar uštjavde, si šajpe te areses jekh liderka"

Pal jekh atako ande saveste sas te merel ando 2019, i Anzhelika Bielova putardjas i organizacia Glaso Romnjako andi Zaporizhzhya te šaj marel pes kontra i violenca karing e džuvlja. Pal i rusikani invazia andar o 2022, voj paruvdjas o than le organizaciako ando Uzhhorod, kothe del vast le romane džuvljen kaj sas bičhalde kheral. Kado intervio lasa avel khetanes amare raportosa Maripe vaš jekh maj Čačutno Avutnipe, sovo sikavel e kontribucie le romenge ko arakhipe le Ukrainako, rodel o impakto le marimasko ande romane komunitete thaj del ideje vaš o inkluzivo vazdipe pal o baro maripe. 

Savi sas i maj phari problema kaj geldjan ande tiro dživipe thaj sar nakhljan opral late? 

Semas atakisardi ando 2019; semas zorales pusavdi le čhurjasa thaj phares dživisardem. Paruvdem miri eksperienca ande jekh maripe kontra i violenca karing e džuvlja, putardem jekh organizacia džuvljengi thaj kerav sja so me dašti te vazdav jekh sigurno than vaš e čhaja thaj e džuvlja.  

Kon vaj so andjas tuke inspiracia te dašti džas maj dur ande phare situacie?  

Miri phuri. Voj si jekh romani džuvli, i čhaj le bare marimaski, savi sas sikljardi ande jekh vrjama kana toke varesave džuvlja sas sikljarde thaj aresli jekh respektisardo manuš andi romani komuniteta thaj vi avrjal late. Voj sikavdjas mange ke vi ande jekh lumja kaj e čačimata le džuvljenge si butivar uštjavde, si šajpe te areses jekh liderka.  

Dašti te phenes amenge pal jekh momento kana mangljan te mekes tut, ama na kerdjan kado thaj so adžutisardjas tut te na mekes tut? 

Kado sas o momento kana semas maškar o dživipe thaj o meripe pal o atako. Semas dživdjardi katar o godisaripe pal miri čhaj, pal o dživipe avere čhajengo thaj džuvljengo save nakhen andar i violenca bazisardi po geno thaj katar o mangipe te marav man kontra kado fenomeno.  

Sar inkeres tut pozitivno kana nakhes andar e pharimata?  

Maj anglal savorendar, miro rom del man vast. Vov si miro suporto thaj sa vrjama bešel paš mande ande orsavi situacia. Sem džutisardi katar miri familia thaj katar miro timo, savesa bariljam sar profesionisturja khatanes. Lav sama pal sako jekh andar lende thaj vi von len sama pal mande.  

Savo sfato kamesas te des varekas kaj nakhel andar jekh phari situacia?  

Na de rigate o avrutno džutimos. Džanav so pharo si te akceptisares o fakto ke san ande jekh vulnerabilo situacia, nakhlem andar kodo kana semas zorales thodi ande miri buti. Si vašno te hatjares ke tiro dživipe thaj o dživipe sake manušesko si i maj bari valorja thaj trebal tu te adžutisares tut thaj vi te mekes averen te den tut vast.  

Sar paruvde e pharimata kaj nakhljan opral lende tiri perspektiva karing o dživipe?  

Sigurno lačharde mire džanimata pal o šerutnipe, areslem te marav man thaj te ovel man jekh zoralo hatjaripe pal o čačipe. Ama vaš mande, i maj bari valorja si te inkeres tiro lačhipe, o kamipe ando ilo thaj empatia. Thaj me aresav te kerav kodo.  

Save lekcie sikliljan kana nakhljan andar e pharimata?  

Siklilem ke si normalo te oves vulnerabilo thaj ke trebal tuke džutimos. O dživipe le manušesko si i maj bari valorja.  

Sar pakjas ke šaj te del vast tiri eksperienca avere manušen kaj nakhen andar sa kasave pharimata? 

Miri eksperienca thaj miri paramisi šaj te sikaven le romane čhajen ke orso si šajutno kana keres buti phares, kana pakjas ande tute, kana ačhjos ke tire principurja thaj valore, mares tut pal tire čačimata thaj pakjas ande aver manuša kaj mangen, čačimasa, te len sama pal tute thaj te den tut vast.  

So motivisarel tut te džas maj dur, vi kana fal tuke phares? 

E paramisja avere džuvljenge thaj čhajenge savenca kerav buti, save aven mande te dav len vast, savende ame džas te asistisaras len. But džuvlja thaj čhaja si diskriminisarde andi societeta thaj ande penge komunitete, dživen ande čorore kondicie, na-i len lačhi edukacia thaj sastimaske servisurja thaj roven pes katar i violenca bazisardi po geno. Si kadja but kerimaske thaj vi maj but te mares tut vaš kodo.  

Kana dikhes palpale, ande tiro drom nakhindos opral e pharimata, so kerel tut te oves barikani? 

O fakto ke nijekhdata na meklem man, ke zumavdem palem thaj palem, ke mardem man, ke pakjav ande mande thaj ke, orsar pakjav ande manusa.  

Soske dikhes tut eroina? 

Na dikhav man eroina, ama dikhav man sar jekh liderka savjaki paramisi šaj anel inspiracia averenge te pakjan ande pende!