E Fundacie vaš Putardi Societeta informisarde avdives ke si te thon 100 milionurja evro vaš o zorjaripe thaj o barjaripe le romane komunitetengo andar i Evropa – astarindos jekh nevo kotor butjako, pašal e trin dekade ande savende i organizacia dinjas vast le romen.
NEW YORK— E Fundacie vaš Putardi Societeta informisarde avdives ke si te thon 100 milionurja evro (109 milionurja dolarja) vaš o zorjaripe thaj o barjaripe le romane komunitetengo andar i Evropa – astarindos jekh nevo kotor butjako, pašal e trin dekade ande savende i organizacia dinjas vast le romen.
O hatjaripe vaš e finance kaj si te den pes dži ando 2030 si te pokinel pes vaš jekh nevi independento fundacia, kaj si lan o ofiso ando Brukselo thaj si te ovel i angluni institucia ke kado baro nivelo, savi si te ovel šerutnjardi katar e roma kana putarela pes o berš kaj avel.
Pašal o fakto ke si te ovel jekh nevo kanalo vaš i Putardi Societeta te del vast i romani kauza, i nevi fundacia si te rodel vi aver neve surse lovenge te šaj promovisarel peski misia.
Vakjarindos pal pesko angadžamento vaš 100 milionurja evro, o Alexander Soros, o šerutno katar e Fundacie vaš Putardi Societeta, phendjas:
“Jekhe neve generaciasa godjale romengi save keren i strategia thaj le financirimaske prioriteturja, sem sigurno ke i nevi fundacia si te ovel jekh dinamiko zor – kaj mangel te sikavel o sasto šajpe le romengo thaj te nakhen opral e purane bariere kaj si len. Si te keras sja so dašti te das vast i fundacia thaj lake liderjen ande jekh misia savi si te anel benefiturja na toke le romenge, ama vi le saste Evropake.”
E Fundacie vaš Putardi Societeta sas o maj vašno suportero le romengo andar i Evropa – i maj bari etnikani minoriteta andar o kontinento – de andar o berš 1990, kana lengi kauza sas anglunes lili samate katar o George Soros, o fondatoro katar i Putardi Societeta.
I nevi Romani Fundacia vaš i Evropa si te kerel buti romane grupurjenca andar e Vestikane Balkanurja, i Estikani Evropa, Spania, Italia, thaj andar i Germania. Kadaja si te ovel šerutnjardi katar o Zeljko Jovanovic, vov liljas sama pal o Ofiso vaš Romane Iniciative katar i Putardi Societeta de andar o berš 2010.
I fundacia si te lel sama thaj si te barjarel e parteneriaturja le Putarde Societetake kerde štare Iniciativenca: le Evropako Romano Instituto vaš Arte thaj Kultura, i Barjarimaski Iniciativa vaš o Romano Antreprenoriato, e Roma vaš i Demokracia thaj o Fondo vaš i Edukacia le Romengi. Sa kadja, si te gelel maj dur i buti kerdi katar i Putardi Societeta bute nacionalo romane miškimatenca, sar si o Aresel andar i Rumunia, Opre Roma andar i Serbia, Khetane andar i Italia, i Permanento Konferencia le Romengi andar i Bulgaria thaj i Avaja andar i Nordikani Macedonia thaj aver.
O Jovanovic, savo si te ovel o eksekutivno direktoro le neve fundaciako phendjas:
“Si te keras buti savorenca kaj šaj gelen maj dur amari misia – te hamisaren o elektoralo thaj o ekonomikano šajpe le maj bare minoritetako andar i Evropa, le galsurjenca katar lake maj pakivale avokaturja, aliaturja thaj influjento amala. Amaro cilo si te vazdas jekh fundacia, savi na toke anel lačhe paruvimata le romenge, ama vi te anel kontribicia ko Evropuno avutnipe bazisardo pi džusticia thaj po čačipe.”
O džutimos le Putarde Societetako vaš e roma andjas:
- Le Evropako Romano Instituto vaš Arte thaj Kultura, putardo ando berš 2017, savo sas o angluno kasavo instituto kaj mangel te promovisarel o romano barikanipe thaj te peravel e predžudekate kontra e roma vaš i arta.
- Le Barjarimaski Iniciativa vaš o Romano Antreprenoriato, savi de andar o berš 2016 zumavdjas te zorjarel e romane komunitete dindos vast e tikne bisnisurja kerde katar e roma.
- Roma vaš i Demokracia, jekh programo kaj mangel te promovisarel i participacia le romengi ande alosarimata thaj ande demokratikani reprezentacia.
- O Fondo vaš i Edukacia le Romengi, kerdo ando berš 2005 te del stipendie thaj granturja save promovisaren i edukacia kaj si lan učo kaliteto, i inkluzivo edukacia vaš e romane sikljovne andar i Centralo, Estikani thaj Sudikani Evropa thaj Turkia.
Jekhe beršutne budžetosa kaj nakhel opral jekh 1 biliono dolarja (917 milionurja evro), e Fundacie vaš Putardi Societeta si o maj baro privato finacatoro opral i phuv vaš e grupurja kaj keren buti te promovisaren i džusticia, o slobodo vakjaripe thaj o čačipe. O nevo dikhipe vaš o džutimos le romengo avel andar jekh maj buhlo paruvipe pal o modo sar si te kerel buti i Putardi Societeta pi sasti phuv.
Roma Foundation for Europe